Documentary account about Ernest Shackleton's Expedition in Antarctica in 1914-1916. This is the 2nd of the 11-part series in ILOCANO narrative.

EXCERPT:

"Beterano iti panagsukisok ken panagdaliasat idiay Antarktika ni Ernest. Tubo daytoy ti kaputotan a naggapu iti Irlandesa (Ireland). Naipasngay daytoy idiay Kilkea, County Kildare idi maika KINSE (15) ti Pebrero, MIL OTSO SIYENTOS SETENTA’Y KUWATRO (1874). Immalis ti kaamaanna a napan Inglatera idi agtawen daytoy iti sangapulo ket nagserbi daytoy iti Armada ti Britania iti panagkabannuagna.

Immuna a napan daytoy idiay Antarktika idi MIL NUEBE SIYENTOS DOS (1902) a kadua ti grupo nga indauluan ni Robert Scott iti daydi ekspedisyon a managan “Panagduktal” (Discovery). Naipagilian nga Ekspedisyon iti Antarktika ti Britania (British National Antarctic Expedition) ti opisyal a naganna.

Nairusat daytoy nga ekspedisyon ti siyensa tapno mapanda sukisoken ti Antarktika a mangduktal maipapan iti biolohia (biology) wenno nakaituboan a galad dagiti naparsua a banag ken dagiti ayup nga agtaeng idiay. Agpaliiwda maipapan ti panagbaliwbaliw ti klima ken atmospera idiay kasta met a mangadalda maipanggep iti sakup ti magnetiko ti South Pole. Kasta met nga adalenda ti heograpia wenno galad ti law-ang ken pisikal a nakaiseknan daytoy a kontinente.

Adu dagidi naduktalanda a baro a disso nga isuda ti nangi-mapa ket naikeddeng met a no mabalinanda idi ket mapanda danonen ti “South Pole”. Daytoy nga ekspedisyon ket naipangruna ti pategna iti pakasaritaan iti daydi panawen ti panagduktal ti Britania iti Antarktika. Nadutokan idi ni Ernest iti saad a Maikatlo-Nga-Opisyal (Third Officer) ket isu ti nagaywan kadagiti balon ken probisyonda. Naipa-akem pay kenkuana ti panangurnos kadagiti kasapulanda a pagliw-liwaan.

Maysa ni Ernest kadagiti tallo a kaunaan a nakagteng iti disso a kaasitgan iti South Pole nga iti daydi a panawen ket di pay nadanon ti tao. Kaduana idi ni Robert Falcon Scott a liderda ken Edward Adrian Wilson a maikadua a surhano. Isu daydi ti kaadaywan a dinanonda idi inkeddeng ni Scott nga agsublidan iti bapor a Discovery a kampoda. Nagsakit ti nakaro a scurvy ni Ernest iti daydi panagsublida ket iti baet ti panagked-kedna, pinagawid ni Scott daytoy iti daydi dimteng a bapor a managan Morning (Bigat). Daytoy a bapor idi ti napan nagitulod ti nayon a balon idiay bapor a Discovery (Panagduktal).

Napan manen ni Ernest idiay Antarktika idi MIL NUEBE SIYENTOS SIYETE (1907) ngem isun ti nangidaulo iti daydi maikadua nga ipapanna. Managan Nimrod daydi nga ekspedisyon ket daytoy ti umuna nga ekspedisyon nga indauluanna. Malaksid iti panagsukisok nga agpaay iti siyensa, gay-at idi ti Nimrod ti makagteng iti Abagatan nga Ungto (South Pole) ti lubong. Iti daytoy nga inrusat ni Ernest, nakadanonda iti agarup SIYAM A PULO KET PITO (97) a milya laengen ket magtengdan daydi disso a gay-atda idi inkeddengna nga agsublida.

Ammo ni Ernest a daydi balonda a taraon ket makaanay laeng a mangidanon kadakuada iti gandatda a disso ngem awanto ti nabatin a pagbiagda iti panagsublida. Iti daydi a desisyonna a panagsubli a dina nagtengan ti disso nga Abagatan nga Ungto, insurat ni Shackleton ken Emily nga asawana ti palawagna: “Pinanunotko, ayatko, nga ad-adda a piliem ti nabiag nga asno ngem ti natay a leon.”

Nagdagup ti SANGARIBO KET PITO GASUT (1700) a milya ti kaadayo ti pinagnada a hielo iti daydi ekspedisyon a Nimrod..."

PLEASE LISTEN TO THE PODCAST FOR THE FULL AND COMPLETE EPISODE.